Deiliskipulag fyrir Kringlureit samþykkt af borgarráði
Borgarráð samþykkti þann 6. nóvember deiliskipulag fyrir nýtt og margbreytilegt borgarhverfi á Kringlureit. Tillaga Reita fasteignafélags um að byggja þar 420 íbúðir í mannvænu og lifandi umhverfi getur því orðið að veruleika.
Engin tvö hús verða eins á Kringlureit en auk íbúðanna munu menningarhús, græn svæði, sólríkt torg, blönduð þjónusta og verslun, og ný hjóla- og gönguleið prýða hverfið sem liggur milli Kringlunnar, Listabrautar og Húss verslunarinnar. Með skipulaginu er brotið blað í uppbyggingu borgarinnar þar sem nýjar íbúðir rísa sem hluti af heildrænni, hlýlegri og vistvænni hönnun á svæðinu öllu.
Heimsþekkta arkitektastofan Henning Larsen og THG arkitektar eru höfundar skipulagsins en hönnuðirnir leituðu í íslenska byggingarlist og sögu miðborgarinnar til innblásturs.
"„Hjarta Reykjavíkur stækkar með þessu skipulagi sem samþykkt var í gær, bæði hvað varðar fermetra og fagurfræði. Við sjáum anda gömlu Reykjavíkur lifna við og mæta ströngum gæða- og umhverfiskröfum nútímans með hætti sem hefur ekki sést áður hér á landi. Þetta er ný nálgun í íbúðaruppbyggingu á Íslandi,“ segir Guðni Aðalsteinsson, forstjóri Reita."
Til marks um gæðin er hverfið í heild sinni mótað samkvæmt ströngum kröfum BREEAM-staðalsins um vistvænar byggingar og skipulag.
Nýja menningarhúsið verður til húsa þar sem áður var prentsmiðja Morgunblaðsins en þannig verður saga hússins hluti af framtíð hverfisins. Ný atvinnurými undir skrifstofur og verslun munu rísa sem framlenging af menningarhúsinu og glæða hverfið mannlífi.
Íbúðirnar verða ólíkar að stærð og lögun. Flest íbúðahúsin verða á þremur til sex hæðum, þau hæstu yst til að skapa skjól fyrir hverfið. Undir húsunum verður bílastæðakjallari en í gegnum hverfið liggur vistgata þar sem umferð hjólandi og gangandi er gert hátt undir höfði. Stefnt er að því að afhenda fyrstu íbúðirnar eftir um það bil þrjú ár.
