Opinn kynningarfundur vegna íbúðauppbyggingar á Kringlusvæðinu

Reykjavíkurborg hefur boðað til fundar þar sem Reitir kynna áform um uppbyggingu á Kringlusvæðinu.

Fundurinn verður haldinn þriðjudaginn 14. maí kl. 17:00 í Ásbergi í Kringlubíói.

Drögin að deiliskipulagstillögunni verða jafnframt til sýnis fyrir almenning á jarðhæð göngugötu Kringlunnar.

Um er að ræða drög að deiliskipulagstillögu 1. áfanga Kringlusvæðis, sem nær til lóðanna Kringlan 1-3 og Kringlan 5. Danska teiknistofan Henning Larsen ásamt THG arkitektum vann tillöguna fyrir Reiti fasteignafélag. Vinna við skipulagið er unnin samkvæmt BREEAM Communities vistvottunarstaðlinum, COWI og VSÓ koma að þeirri vinnu.

Á fundinum verður farið stuttlega yfir aðdraganda deiliskipulagsgerðar og deiliskipulagslýsingar fyrir áfanga 1-3, en að því loknu munu höfundar fara yfir drög að deiliskipulagstillögu sinni og jafnframt gera grein fyrir þeirri vinnu sem að baki liggur. Að auki verður deiliskipulagslýsing 1.-3. áfanga Kringlunnar aðgengileg í skipulagsgátt þar sem senda má inn athugasemdir á slóð Skipulagsstofnunar.

Fundurinn er öllum opinn og munu Reitir opna fyrir umræður og spurningar varðandi deiliskipulagstillöguna sem er í undirbúningi.

Margbreytileiki með útirýmum

Á Kringlusvæðinu er reiknað með um 450 íbúðum ásamt menningarhúsi. Deiliskipulagstillagan gerir ráð fyrir fjölbreyttum húsformum ásamt nýjum skjólgóðum og sólríkum götu- og torgrýmum sem samtvinnast stærri útirýmum.

Umferð akandi, hjólandi og gangandi er gert jafnhátt undir höfði með sérstakri áherslu á gönguvænt umhverfi. Meginmarkmið tillögunnar er að móta nýtt og þétt borgarumhverfi þar sem margbreytileiki fær notið sín.

Upplýsingar um fundinn