Skipulag Orkureitsins fær BREEAM Communities vottun með "Excellent" einkunn
Reitir fóru fyrir skipulagsgerð á Reitnum sem hefur nú verið seldur að skrifstofubyggingunni undanskilinni.
- Reitir fasteignafélag er fyrri eigandi reitsins og eigandi skrifstofubyggingarinnar á reitnum. Reitir fóru fyrir skipulagsgerð á reitnum samkvæmt BREEAM staðlinum
- SAFÍR byggingar, sem keypti byggingarheimildir á reitnum 2022, byggir nú 440 íbúðir og um 2 þús. m2 atvinnuhúsnæðis á reitnum
Skipulag reitsins gerir ráð fyrir skjólgóðum inngörðum sem eru að hluta til opnir og vel tengdir aðliggjandi svæðum. Borgarlínustöð er áformuð framan við lóðina við Suðurlandsbraut og góðir göngu og hjólastígar tengjast skipulagsvæðinu. Hugað hefur verið að aðlögun að loftslagsbreytingum og mikið er lagt upp úr gæðum opinna svæða, t.d. með blágrænum innviðum, endurnýtingu byggingarefna og góðri lýsingu. Loftræstisamstæða verður fyrir hverja íbúð sem tryggir bætt loftgæði og endurnýtingu varma. Iðnaðarhúsnæði að Ármúla 31 og bakhús á miðri lóðinni munu víkja fyrir 3-8 hæða byggingum í borgarmiðuðu skipulagi. Gamla Rafmagnsveituhúsið verður endurnýjað og heldur sínum virðingarsess á lóðinni.
BREEAM Communities er alþjóðlega viðurkenndur breskur vistvottunarstaðall fyrir skipulagsgerð, þar sem þriðji aðili vottar skipulagið með tilliti til umhverfislegra, félagslegra og efnahagslegra gæða. Vottunin er gæðastimpill á skipulagið, byggðina og samfélagið sem þar mun verða til.
SAFÍR byggingar ehf hefur þegar hafið byggingu fyrsta áfanga svæðisins og gert er ráð fyrir að fyrstu íbúar flytji inn á Orkureitinn haustið 2024. Reitir fasteignafélag, eigandi gamla Rafmagsveituhússins og fyrrum eigandi reitsins, sá um öflun vottunarinnar og skipulag svæðisins á árunum 2018-2022 í samvinnu við skipulagsfulltrúa Reykjavíkur.
Reitir þakka Reykjavíkurborg fyrir gott samstarf og sömuleiðis samstarfsaðilum fyrir samstarfið og vel unnið verk. Skipulagshöfundar eru Alark arkitektar. VSÓ ráðgjöf sá um verkefnastjórnun, verkfræðihönnun, byggðatækni og umhverfismál. Landslag sér um landslagshönnun og ráðgjöf því tengdu á skipulagsstigi. Mannvit er úttektaraðili vegna BREEAM Communities vottunarinnar. Einnig kom Náttúrufræðistofa Kópavogs og Efla að vinnu varðandi skipulagið og BREEAM vottuninni.
