Hér má finna samþykktir Reita, stefnur og starfsreglur.

Stjórnarhættir Reita. Samþykktir, stefnur og starfsreglur

Samþykktir, stefnur og starfsreglur

Hér finnur þú samþykktir Reita, stefnur og starfsreglur.

Samþykktir þessar eru settar til fyllingar ákvæðum hlutafélagalaga nr. 2/1995.

Nafn, lögheimili og tilgangur félagsins

Félagið er hlutafélag og nafn þess er Reitir fasteignafélag hf.

Heimili félagsins er að Kringlunni 4-12, 103 Reykjavík.

Tilgangur félagsins er kaup, sala og rekstur fasteigna og lausafjár, kaup, sala og eignarhald á verðbréfum, ásamt lánastarfsemi tengdri rekstrinum og annar skyldur rekstur.

Hlutafé félagsins er 745.638.233 kr. – sjö hundruð fjörtíu og fimm milljónir sex hundruð þrjátíu og átta þúsund tvö hundruð þrjátíu og þrjár krónur.  Hver hlutur er að fjárhæð 1 kr. - ein króna - að nafnvirði eða margfeldi þeirrar fjárhæðar. Hlutir skulu hljóða á nafn.

Heimilt er að hækka hlutafé félagsins með ályktun hluthafafundar, hvort heldur með áskrift nýrra hluta eða útgáfu jöfnunarhluta. Hluthafar skulu hafa forgangsrétt að nýjum hlutum í samræmi við hlutafjáreign sína. Hluthafafundur getur þó, með samþykki 2/3 hluta greiddra atkvæða sem og samþykki hluthafa sem ráða yfir minnst 2/3 hlutum þess hlutafjár, sem farið er með atkvæði fyrir á hluthafafundinum, vikið frá þessari reglu, sbr. 3. mgr. 34. gr. laga nr. 2/1995 um hlutafélög. Greiði áskrifandi ekki tilskilið hlutafé á gjalddaga, skal heimilt að innheimta dráttarvexti í samræmi við ákvörðun Seðlabanka Íslands á hverjum tíma um grunn dráttarvaxta og verðtryggingu, af skuldinni frá þeim tíma.

Hluthafafundur einn getur ákveðið lækkun hlutafjár.  

Hlutabréf félagsins eru gefin út með rafrænum hætti samkvæmt ákvæðum laga nr. 131/1997 um rafræna eignaskráningu verðbréfa. Stjórn félagsins skal halda hlutaskrá samkvæmt lögum. Hlutaskrá skal vera aðgengileg hluthöfum. Þar skulu koma fram upplýsingar um hluthafa félagsins og hlutafjáreign þeirra.

Gagnvart félaginu skal hlutaskrá frá verðbréfamiðstöð sem hlotið hefur starfsleyfi til að annast eignarskráningu verðbréfa skoðast sem fullgild sönnun fyrir eignarrétti að hlutum í félaginu og teljast hlutaskrá félagsins sjálfs. Eignaskráning rafrænt útgefins hlutabréfs hjá verðbréfamiðstöð veitir skráðum eiganda þess lögformlega heimild fyrir þeim réttindum sem hlutabréfinu fylgir. Hvers kyns tilkynningar til hluthafa og arðgreiðslur skulu byggðar á  hlutaskránni.

Hluthafi ber ábyrgð á því að hlutaskrá geymi réttar upplýsingar um hann en verðbréfamiðstöð sækir upplýsingar um hluthafa í Þjóðskrá Íslands.

Engar hömlur eru lagðar á veðsetningu, sölu eða annarskonar framsal hluta í félaginu. Um skrásetningu veða, eigendaskipti og framkvæmd þeirra fer eftir gildandi lögum um rafræna eignaskráningu verðbréfa og reglna sem settar eru á grundvelli þeirra.

Félagið má ekki veita lán út á hluti sína.

Hluthafi ber ekki ábyrgð á skuldbindingum félagsins umfram hlut sinn í félaginu.

Engin sérréttindi fylgja hlutum í félaginu.

Hluthafar þurfa ekki að sæta innlausn hluta sinna nema lög kveði svo á um.

Félaginu er heimilt að kaupa eigin hluti að því marki sem lög leyfa, sbr. 55.-62. gr. VIII kafla hlutafélagalaga nr. 2/1995. Í tilviki 55. gr. hlutafélagalaga þarf samþykki hluthafafundar að liggja fyrir áður en keypt er. Samþykki hluthafafundur að veita stjórn félagsins heimild lögum samkvæmt til kaupa á eigin hlutum og eftir atvikum með framkvæmd endurkaupaáætlunar skal slíkrar heimildar getið í sérstökum viðauka við samþykktir þessar sem skal þá vera hluti af samþykktunum þann tíma sem heimildin er í gildi. Atkvæðisréttur fylgir ekki þeim hlutum sem félagið á sjálft.

Félagið má hafa rafræn samskipti við hluthafa. Slík rafræn samskipti skulu jafngild pappírssamskiptum. Heimildin nær til hvers kyns samskipta svo sem um boðun hluthafafunda, greiðslu arðs eða annarra tilkynninga frá stjórn. Stjórn skal setja reglur um framkvæmd rafrænna samskipta og þær kröfur sem gera skal til hugbúnaðar sem skal vera hluthöfum aðgengilegur. Vilji  hluthafar  nýta sér rafræn samskipti við félagið skulu þeir tilkynna félaginu  það í samræmi við reglur sem stjórn setur.

Æðsta vald í málefnum félagsins er í höndum lögmæts hluthafafundar.

Hluthafar, umboðsmenn og ráðgjafar þeirra hafa rétt til að sækja hluthafafundi í samræmi við reglur hlutafélagalaga. Formaður og meirihluti stjórnar ásamt framkvæmdastjóra skulu vera viðstaddir hluthafafundi, nema forföll hamli. Sé um aðalfund að ræða skal endurskoðandi félagsins einnig vera viðstaddur. Starfsmenn hafa rétt til þess að sækja hluthafafundi félagsins án málfrelsis, tillöguréttar eða atkvæðisréttar, séu þeir ekki jafnframt hluthafar. Framkvæmdastjóri og endurskoðandi félagsins hafa fullt málfrelsi og tillögurétt á hluthafafundum þótt þeir séu ekki hluthafar. Stjórn og framkvæmdastjóra er heimilt að bjóða sérfræðingum setu á einstökum hluthafafundum, ef leita þarf álits þeirra eða aðstoðar.

Stjórn er heimilt að ákveða að hluthafafundur verði  haldinn rafrænt, hvort heldur að hluta eða öllu leyti. Hluthafa skal þó ávallt gefinn kostur á að greiða atkvæði, bréflega eða rafrænt, um þau mál sem eru á dagskrá hluthafafundar.

Ákveði stjórn að nýta þessa heimild  mun hún tryggja að rafrænn fundur fari  fram á öruggan hátt og að tækjabúnaður sem notaður er uppfylli skilyrði hlutafélagalaga.

Þess skal getið í fundarboði fari fundur fram með rafrænum hætti. Fundarboðið skal þá jafnframt bera með sér slíkar upplýsingar um framkvæmd fundarins að hluthöfum sé gert kleift að taka þátt í honum, svo sem um nauðsynlegan tæknibúnað fyrir hluthafa, hvernig hluthafar tilkynni þátttöku sína, hvernig atkvæðagreiðsla fer fram og hvar hluthafar nálgast upplýsingar um fjarskiptabúnað og aðgangsorð til þátttöku á fundinum. 

Hluthafar sem hyggjast taka þátt í rafrænum hluthafafundi skulu tilkynna skrifstofu félagsins um þátttöku sína með a.m.k. sjö daga fyrirvara. Samtímis skulu þeir leggja fram skriflegar spurningar varðandi dagskrá eða framlögð skjöl sem þeir óska svara við á fundinum. Spurningar og svör eiga að vera aðgengileg hluthöfum í síðasta lagi við upphaf hluthafafundar.

Innslegið aðgangsorð í tiltekinn fjarskiptabúnað jafngildir undirskrift viðkomandi hluthafa og telst staðfesting á fundarsókn.

Aðalfundur skal haldinn fyrir lok maí ár hvert.

Aukafundi skal halda eftir ákvörðun stjórnar,  að kröfu endurskoðanda félagsins eða hluthafa sem ráða að minnsta kosti 1/20 hluta hlutafjár í félaginu. Skal krafan skriflega gerð og fundarefni tilgreint í fundarboði.

Stjórn annast boðun hluthafafunda. Boða skal til hluthafafunda með auglýsingu í innlendum fjölmiðli, með rafrænum hætti, eða með öðrum sannanlegum hætti. Hlutahafar geta einnig óskað eftir því að fá fundarboðun senda skriflega.

Til hluthafafunda skal boða með minnst 21 dags fyrirvara og lengst 28 daga fyrirvara. Ákvæði hlutafélagalaga gilda um framhaldsfundi.

Hluthafafundur er lögmætur ef hann er löglega boðaður, án tillits til fundarsóknar.

Stjórn er heimilt að ákveða að hluthafafundur fari fram annars staðar en á heimili félagsins.

Eitt atkvæði fylgir hverjum 1 kr. - einnar krónu - hlut í félaginu.

Á hluthafafundi ræður afl atkvæða nema öðruvísi sé mælt fyrir í lögum eða samþykktum þessum. Verði atkvæði jöfn telst tillaga fallin.

Á aðalfundi skulu tekin fyrir þessi mál:

1.       Stjórn skýrir frá rekstri félags og hag þess á liðnu starfsári.

2.       Ársreikningur og samstæðureikningur félagsins fyrir liðið starfsár skulu lagðir fram til staðfestingar ásamt athugasemdum endurskoðanda, ef einhverjar eru.

3.       Tekin skal ákvörðun um hvernig skal fara með hagnað eða tap og um arð og framlög í varasjóð.

4.       Tillaga stjórnar um starfskjarastefnu félagsins skal lögð fram til staðfestingar.

5.       Tillaga stjórnar um skipun nefndarmanna í tilnefningarnefnd skal lögð fram til staðfestingar.

6.       Stjórn skal kjörin og endurskoðandi eða endurskoðunarfélag.

7.       Ákvörðun skal tekin um laun stjórnar, undirnefnda stjórnar og tilnefningarnefndar fyrir komandi starfsár.

8.       Umræður og atkvæðagreiðslur um önnur málefni sem löglega eru upp borin.

Hluthafafundi stýrir fundarstjóri sem fundurinn kýs. Fundarstjóri skal láta kjósa fundarritara. Hann heldur fundargerð þar sem gerð er grein fyrir  ákvörðunum sem teknar eru, úrslitum atkvæðagreiðslna og öðru markverðu sem á hluthafafundi gerist. Fundargerðir eru færðar í fundargerðabók og teljast  fullgild sönnun þess sem fram hefur farið á hluthafafundi.

Fundarstjóri kannar lögmæti fundarins. Hann stýrir umræðum og atkvæðagreiðslum. Ef hluthafafundur er rafrænn skal fundarstjóri staðfesta að tækjabúnaður sem notaður er standist kröfur hlutafélagalaga.

Þegar fundur hefur verið settur skal gerð skrá yfir hluthafa og umboðsmenn þeirra er fund sækja til þess að ljóst sé hversu mörgum hlutum og atkvæðum hver þeirra ræður yfir.

Stjórn skal skipuð fimm einstaklingum kjörnum á aðalfundi til eins árs í senn. Um hæfi þeirra fer að lögum.

Við stjórnarkjör skal tryggja að kynjahlutföll innan stjórnar séu sem jöfnust og að hlutfall stjórnarmanna af sama kyni fari ekki umfram hlutfallið 3/5. Nú eru fleiri en þrír frambjóðendur af sama kyni meðal þeirra fimm efstu og skulu þá þeir þrír þeirra sem flest atkvæði hljóta skoðast rétt kjörnir auk þeirra tveggja af öðru kyni sem næstir koma að atkvæðum. Raskist kynjahlutföll vegna brotthvarfs stjórnarmanns úr stjórn áður en starfsári stjórnar lýkur, telst það ekki fara gegn ákvæðum þessarar greinar.

Innan félagsins skal starfa tilnefningarnefnd sem hefur það hlutverk að undirbúa stjórnarkjör á aðalfundi félagsins ár hvert, auglýsa eftir og taka við tillögum um frambjóðendur og gera rökstudda tillögu til aðalfundar um frambjóðendur til að taka kjöri í stjórn þess, í samræmi við gildandi starfsreglur tilnefningarnefndar á hverjum tíma, sem samþykktar eru af hluthafafundi. 

Nú hyggjast fleiri bjóða sig fram til stjórnar en þeir sem tilnefningarnefnd hefur gert tillögu um, og skulu þeir þá tilkynna félaginu um framboð sitt a.m.k. sjö sólarhringum fyrir hluthafafund. Tilkynning skal uppfylla ákvæði laga um hlutafélög. Jafnframt skulu frambjóðendur greina frá því hvort þeir telji sig óháða félaginu og stórum hluthöfum þess samkvæmt skilyrðum í Leiðbeiningum um stjórnarhætti fyrirtækja eins og þau eru skilgreind á hverjum tíma.

Upplýsingar um frambjóðendur til stjórnar skulu vera aðgengilegar fyrir hluthafa félagsins á vefsíðu þess og skrifstofu eigi síðar en sex sólarhringum fyrir hluthafafund.

Stjórnarkjör skal jafnan vera skriflegt ef framboð berast frá fleirum en í stjórn eru. Ef hluthafar félagsins eru 200 eða fleiri geta hluthafar sem ráða yfir minnst 1/10 hlutafjárins krafist þess að beitt sé hlutfalls- eða margfeldiskosningu við kjör stjórnarmanna. Ef hluthafar eru færri en 200 þurfa hluthafar sem ráða yfir 1/5 hluta hlutafjárins að standa að kröfunni. Komi fram krafa frá fleiri en einum hluthafahópi og krafist er bæði hlutfalls- og margfeldiskosninga skal beitt margfeldiskosningu. Krafa um hlutfalls- eða margfeldiskosningu þarf að hafa borist stjórn að lágmarki fimm sólarhringum fyrir hluthafafund.

Stjórn stýrir öllum málefnum félagsins milli hlutahafafunda. Hún gætir hagsmuna þess gagnvart þriðja aðila.

Undirskrift meirihluta stjórnar skuldbindur félagið.

Stjórn kýs sér formann og varaformann. Séu atkvæði jöfn skal hlutkesti ráða. Að öðru leyti skiptir stjórn  með sér verkum.

Formaður boðar til stjórnarfunda með að minnsta kosti 3ja daga fyrirvara, nema allir stjórnarmenn sammælist um skemmri frest, og stýrir þeim. Hver stjórnarmaður getur krafist stjórnarfundar. Framkvæmdastjóri á sama rétt.

Stjórnarfundir eru lögmætir ef meirihluti stjórnarmanna sækir fund. Halda skal fundargerð um stjórnarfundi og skulu stjórnarmenn og framkvæmdastjóri staðfesta hana með undirskrift sinni.

Að öðru leyti en áskilið er í lögum eða samþykktum þessum ræður afl atkvæða málum á stjórnarfundum. Falli atkvæði jöfn ræður atkvæði formanns.

Stjórn skal setja sér starfsreglur þar sem nánar er kveðið á um framkvæmd starfa hennar.

Kveði starfsreglur á um að stjórn kjósi í nefndir sem starfi á vegum stjórnar, skulu niðurstöður þeirra aðeins vera leiðbeinandi fyrir stjórn  nema mælt sé fyrir á annan veg í lögum.

Stjórn ræður framkvæmdastjóra, ákveður starfskjör hans og veitir honum lausn frá störfum. Hún veitir prókúruumboð fyrir félagið.

Framkvæmdastjóri hefur með höndum stjórn á daglegum rekstri félagsins og kemur fram fyrir þess hönd í öllum málum sem varða daglegan rekstur. Framkvæmdastjóri situr fundi stjórnar nema stjórn ákveði annað. Framkvæmdastjóra ber að framfylgja þeim ákvörðunum sem teknar eru af stjórn.

Á aðalfundi skal kjósa endurskoðanda eða endurskoðunarfélag fyrir félagið. Endurskoðandi skal endurskoða reikninga félagsins  og leggja niðurstöður sínar fyrir aðalfund. Endurskoðanda má ekki kjósa úr hópi stjórnarmanna eða starfsmanna félagsins.

Starfsár og reikningsár er almanaksárið. Stjórnin skal hafa gengið frá ársreikningi a.m.k. 21 degi fyrir aðalfund.

Aðalfundur ákveður úthlutun arðs og greiðslur í varasjóð að fenginni tillögu stjórnar. Óheimilt er að ákveða á aðalfundi meiri úthlutun arðs en stjórn gerir tillögu um. Arðgreiðslur skulu inntar af hendi eigi síðar en sex mánuðum frá samþykkt úthlutunar.

Samþykktum þessum má breyta á lögmætum aðalfundi eða aukafundi með 2/3 hlutum greiddra atkvæða, svo og með samþykki hluthafa sem ráða yfir að minnsta kosti 2/3 þess hlutafjár sem farið er með atkvæði fyrir á fundinum, enda sé annað atkvæðamagn ekki áskilið í hlutafélagalögum eða samþykktum þessum.

Með tillögur um slit og skipti á félaginu eða samruna við annað félag eða önnur félög skal fara sem um breytingar á samþykktum þessum. Þarf atkvæði 2/3 hluta greiddra atkvæða, svo og samþykki hluthafa sem ráða yfir að minnsta kosti 2/3 hlutum þess hlutafjár sem farið er með atkvæði fyrir á fundinum til að ákvörðun um slit eða samruna verði gild, enda sé annað atkvæðamagn ekki áskilið í hlutafélagalögum eða samþykktum þessum.

Með stefnu Reita fasteignafélags um fjárhagsleg markmið og ráðstöfun verðmæta er tilgreint hvernig félagið ætlar að haga fjármögnun sinni og skila verðmætum úr rekstri félagsins, beint eða óbeint, til hluthafa þess. Stefnan skapar grundvöll fyrir stjórn um mótun tillagna til aðalfunda um arðgreiðslur til hluthafa eða kaup á eigin bréfum.

Stefnt er því að hlutfall vaxtaberandi lána félagsins af verðmæti fjárfestingareigna verði að jafnaði 60-65% og að hlutfall rekstrarhagnaðar af greiddum vöxtum nemi að lágmarki 1,8. Að jafnaði skal fjármagnskostnaður Reita vera í takt við fjármagnskostnað sambærilegra fyrirtækja.

Stefnt er að því að raunarðsemi eiginfjár verði til lengri tíma a.m.k. 7% yfir ávöxtunarkröfu langra verðtryggðra skuldabréfa með ríkisábyrgð en tekur þó mið af markaðsaðstæðum hverju sinni.

4.gr.  Arðgreiðslur og kaup á eigin bréfum

Stefna félagsins er að greiða hluthöfum stöðugan og vaxandi árlegan arð. Stefnt er að því að skila a.m.k. 1/3 af rekstrarhagnaði hvers árs til hluthafa, annað hvort í formi arðgreiðslna eða með kaupum á eigin bréfum.

Ákvörðun um arðgreiðslur og kaup á eigin bréfum hverju sinni taka mið af fjárhagslegri stöðu félagsins, möguleikum til fjárfestinga, stöðu á markaði, ákvæðum laga og samninga sem félagið hefur gert.

Stefna þessi tekur þegar gildi og ber forstjóri ábyrgð á framfylgd hennar.

Ofangreind Stefna um fjárhagsleg markmið og ráðstöfun verðmæta til hluthafa var samþykkt á aðalfundi Reita þann 30. apríl 2015.

Stefna um fjárhagsleg markmið og ráðstöfun verðmæta til hluthafa

Starfskjarastefna Reita fasteignafélags hf. er sett samkvæmt 79. gr. a. laga nr. 2/1995 um hlutafélög og byggir á meginreglum um góða stjórnarhætti fyrirtækja. Stefnunni er ætlað að styðja við markmið félagsins um að veita góða þjónustu af öryggi og ábyrgð með arðsömum rekstri.

Markmið starfskjarastefnu félagsins er að tryggja að það geti á hverjum tíma boðið stjórnendum og öðru starfsfólki samkeppnishæf kjör og starfsumhverfi á við það sem býðst í hliðstæðum störfum hér á landi þannig að starfskjör séu hvetjandi, styðji við rekstrar- og þjónustumarkmið félagsins hverju sinni og að eðlilegt samræmi sé í launasetningu þess. Starfskjarastefnunni er ætlað að treysta langtímahagsmuni eigenda félagsins, starfsfólks og annarra hagsmunaaðila með skipulegum, einföldum og gagnsæjum hætti. 

Á vettvangi stjórnar starfar undirnefnd, starfskjaranefnd, sem skal vera stjórn og forstjóra ráðgefandi um starfskjör æðstu stjórnenda félagsins.

Við mótun tillagna skal nefndin einkum horfa til upplýsinga um starfskjör hjá félögum sem starfa á hliðstæðum mörkuðum eða sækjast eftir áþekkri reynslu og þekkingu og félagið sjálft, allt að teknu tilliti til hefðbundinna mælikvarða um umsvif, ábyrgð og árangur.

Nefndin skal fylgjast með því að starfskjör æðstu stjórnenda félagsins séu innan þess ramma sem starfskjarastefnan setur og  skal hún gefa um það skýrslu til stjórnar félagsins í undanfara aðalfundar ár hvert. Nefndin skal ennfremur árlega gera tillögu til stjórnar um endurskoðun starfskjarastefnu.

Stjórnarmenn skulu fá greidda fasta þóknun fyrir störf sín. Þóknun stjórnarmanna skal ákveða á aðalfundi ár hvert. Gerir stjórnin tillögu um stjórnarlaun fyrir komandi starfsár og skal í þeim efnum taka mið af þeirri ábyrgð sem á stjórnarmönnum hvílir, þeim tíma sem varið er til stjórnarstarfa og greiðslum fyrir stjórnarstörf í öðrum kauphallarskráðum félögum.

Á aðalfundi skal jafnframt ákveða þóknun fyrir störf í undirnefndum stjórnar og í tilnefningarnefnd félagsins.

Starfskjör forstjóra skulu tilgreind í skriflegum ráðningarsamningi hans við stjórn félagsins. Ráðningarsamningur hans skal tilgreina föst laun, þ.e. grunnlaun, orlof, greiðslur í lífeyrissjóð, starfstengd hlunnindi, uppsagnarfrest og reglur um árangurstengd viðbótarlaun ef því er að skipta. Föst laun og aðrar greiðslur til forstjóra skulu vera samkeppnishæf á markaði hliðstæðra félaga og taka mið af hæfni, menntun, reynslu, ábyrgð og umfangi starfans.

Árlega skal endurskoða starfskjör forstjóra og skal starfskjaranefnd við þá endurskoðun líta til launaþróunar í áþekkum störfum, framlags forstjóra sem og árangurs félagsins og afkomu.

Miða skal við að uppsagnarfrestur forstjóra sé ekki umfram 12 mánuðir og að ekki komi til greiðslna en sem því svarar við starfslok.

Forstjóri ræður framkvæmdastjóra félagsins og semur um starfskjör þeirra. Starfskjör annarra starfsmanna skulu á sama hátt og starfskjör forstjóra tilgreind í skriflegum ráðningarsamningum og vera samkeppnishæf á markaði og samræmast áherslum stjórnar um framkvæmd starfskjarastefnunnar. Allir starfsmenn félagsins eru á föstum mánaðarlegum launum og þiggja ekki aðrar greiðslur, nema um slíkt sé samið sérstaklega.

Við gerð ráðningarsamninga skal haft að leiðarljósi að ekki komi til frekari greiðslna við starfslok en fram koma í ráðningarsamningi.

Stjórn félagsins getur að tillögu forstjóra og að fenginni umsögn starfskjaranefndar heimilað forstjóra að umbuna föstu starfsfólki til viðbótar föstum umsömdum launum vegna sérstakra aðstæðna eða árangurs sem náðst hefur í rekstri félagsins. Sú umbun skal taka mið af frammistöðu, ábyrgð og framtíðarmöguleikum viðkomandi innan félagsins og byggja á því að tiltekin rekstrarleg og persónubundin markmið hafi náðst á undangengnu rekstrarári.

Stjórninni er heimilt að setja forstjóra og í samráði við hann framkvæmdastjórum eða lykilstarfsmönnum sérgreind mælanleg markmið um árangur í rekstri félagsins, bæði fjárhagsleg og rekstrarleg, sem lúti að framvindu einstakra verkefna eða ferla og horfi bæði til rekstrarárangurs félagsins í heild sem og þeirra þátta sem hlutaðeigandi stjórnendur hafa mest áhrif á. Árangursviðmið skulu við það miðuð að áætlanir félagsins gangi eftir, bæði til lengri og skemmri tíma. Heimilt er að líta til þróunar markaðsverðs hlutabréfa félagsins við mat á rekstrarárangri þess. Markmiðin skulu m.a. endurspegla áherslur félagsins á sjálfbærni og samfélagslega ábyrgð. Hámark árangurstengdra greiðslna stjórnenda á hverju rekstrarári skal miðast við þriggja mánaða grunnlaun. Stjórn skal innan mánaðar frá lokum aðalfundar samþykkja áætlun um árangurstengdar greiðslur vegna rekstrarársins þar sem kemur fram umfang og árangursviðmið. Stjónr getur endurskoðað áætlunina innan ársins ef tilefni er til.

Hófs verður gætt í árangurstengdum greiðslum og við það miðað að hlutdeild þeirra af heildarlaunum verði innan við 15%.

Telji stjórn það þjóna langtímahagsmunum félagsins og hluthöfum þess að auka árangurstengingar launa starfsfólks, t.d. með gerð kaupréttarsamninga, skal áætlun þar um lögð fyrir stjórn, þar sem m.a. komi glöggt fram hvernig áætlunin styðji við langtímahagsmuni félagsins og hver ætluð áhrif verði á samsetningu fastra launa og breytilegra. Áður en kaupréttaráætlun er samþykkt skal leita samþykkis hluthafafundar fyrir megináherslum hennar.

7. gr. Skaðleysi stjórnar og framkvæmdastjórnar

Félagið skal tryggja að á hverjum tíma sé í gildi starfsábyrgðartrygging fyrir stjórnarmenn og æðstu stjórnendur, bæði starfandi og fyrrverandi, vegna starfa þeirra í þágu félagsins. Félagið skal tryggja að þeim sé haldið skaðlausum af kröfum sem á þá kunna að verða gerðar eða á þá kunna að falla vegna starfa þeirra fyrir félagið að svo miklu leyti sem slík krafa er ekki til komin fyrir saknæma háttsemi hlutaðeigandi sem metin er honum sem ásetningur eða stórfellt gáleysi.

Félagið greiðir tryggingariðgjald starfsábyrgðartryggingar og eðlilegan kostnað af málsvörn gagnvart kröfum eða rannsóknum af ofangreindum toga með fyrirvara um rétt til endurkröfu, komi síðar í ljós að viðkomandi hafi í umræddu tilviki af ásetningi eða stórfelldu gáleysi brotið gegn trúnaðarskyldum sínum við félagið eða ákvæðum laga í starfi sínu fyrir það.

Á aðalfundi félagsins skulu hluthafar upplýstir um heildarfjárhæð greiddra launa til stjórnarmanna og forstjóra á liðnu starfsári auk annarra greiðslna ef einhverjar eru.

Þessi starfskjarastefna Reita fasteignafélags hf. er leiðbeinandi fyrir félagið og stjórn þess mæli lög ekki fyrir um annað. Hún tekur í aðalatriðum til þeirra þátta sem nefndir eru hér að ofan. Starfskjarastefnan skal samþykkt á aðalfundi félagsins með eða án breytinga.

Hafi verið vikið frá starfskjarastefnunni í veigamiklum atriðum skal stjórn félagsins færa slík frávik til bókar í fundargerðarbók ásamt rökstuðningi. Skal og gera næsta aðalfundi grein fyrir slíkum frávikum.

Svo samþykkt á aðalfundi félagsins þann 6. mars 2024.

Starfskjarastefna fyrir Reiti fasteignafélag hf. og dótturfélög

Reitir fasteignafélag hf. (Reitir) sérhæfir sig í eignarhaldi,  þjónustu og rekstri fasteigna með áherslu á verslunarhúsnæði, skrifstofuhúsnæði, iðnaðarhúsnæði og hótelbyggingar.

Reitir leggja þannig til umgjörð um atvinnustarfsemi þar sem stærðarhagkvæmni, fjölbreytileiki og sérfræðiþekking skila viðskiptavinum og eigendum ávinningi. Reitir fjárfesta einnig í þróunarverkefnum á fasteignamarkaði.

Jákvæðni, fagmennska og samvinna eru gildi Reita. Stjórn og starfsfólk félagsins á að hafa gildin til hliðsjónar í öllum samskiptum við samstarfsmenn, viðskiptavini, hluthafa og aðra hagsmunaaðila.

Stefnt er að því að Reitir treysti stöðu sína sem öflugasta fasteignafélag landsins. Félagið mun leggja áherslu á atvinnuhúsnæði, einkum á höfuðborgarsvæðinu.

Markaðssókn félagsins mun felast í frekari styrkingu eignasafnsins með kaupum á vel völdum eignum, fasteignaþróun og auknum samskiptum við viðskiptavini, með það að markmiði að skilja þeirra þarfir og uppfylla þær.

Þannig staðfest í stjórn Reita fasteignafélags hf. 4. júní 2020.

Reitir fasteignafélag hf. (Reitir) hefur mótað sérstaka fjárfestingarstefnu í þeim tilgangi að skapa umgjörð um nýjar fjárfestingar félagsins og fjárfestingu í þróunarverkefnum á fasteignamarkaði almennt.

Nýjum fjárfestingum er einkum ætlað að vera innan höfuðborgarsvæðisins eða á svæðum þar sem félagið á fasteignir fyrir. Auk þess getur þeim verið ætlað styðja við fyrirliggjandi viðskiptasambönd. Reitir munu einnig fjárfesta í þróunarverkefnum á fasteignamarkaði.

Að jafnaði er gerð krafa um arðsemi einstakra fjárfestinga sem speglar stefnu Reita um fjárhagsleg markmið og arðsemi.

Svo staðfest af stjórn Reita þann 4. júní 2020.

Reitir fasteignafélag hf. (Reitir) sinnir upplýsingagjöf í samræmi við upplýsingastefnu félagsins. Upplýsingastefnan á að tryggja jafnan og skilvirkan aðgang hagsmunaaðila að réttum og áreiðanlegum upplýsingum um rekstur félagsins. Þannig má auka þekkingu þeirra og stuðla að því að starfsemi Reita njóti sannmælis.

Helstu hagsmuna- og samskiptaaðilar, sem upplýsingastefna Reita tekur til, eru hluthafar, fjárfestar, greiningaraðilar, matsfyrirtæki, kauphöll Nasdaq á Íslandi, fjölmiðlar, lánveitendur og viðskiptavinir.

Reitir fylgja í öllu þeim lögum og reglum er gilda um upplýsingaskyldu félaga sem skráð eru á Aðallista Kauphallar Nasdaq á Íslandi.

Reitum ber að birta opinberlega upplýsingar eins og mælt er fyrir um í lögum um verðbréfaviðskipti og reglugerðum sem sækja heimildir sínar þangað. Reglur Nasdaq á Íslandi fyrir útgefendur fjármálagerninga, eins og þær eru á hverjum tíma, mæla einnig fyrir um hvað félaginu ber að birta opinberlega.

Fréttatilkynningum félagsins, sem falla undir upplýsingaskyldu þess, er dreift í gegnum fréttaveitu Nasdaq á Íslandi (GlobeNewswire). Fréttir þessar munu birtast samtímis á vef Reita (www.reitir.is). Reitir munu í samræmi við upplýsingaskyldu félagsins birta fréttir og veita upplýsingar um öll mál sem teljast hafa umtalsverð áhrif á rekstur, stefnu og þróun félagsins.

Á vefsíðu Reita er að finna svæði sem ber heitið Fjárfestayfirlit. Þar má jafnframt nálgast þær upplýsingar sem félagið mun birta í samræmi við útgefendareglur Kauphallar og stjórnarhætti félagsins.

Reitir stefna að því að birta fréttir af starfsemi félagsins, sem falla ekki undir upplýsingaskyldu þess, á vef sínum og senda eftir atvikum fréttatilkynningar þess efnis til fjölmiðla.

Í kjölfar árshlutauppgjöra halda Reitir kynningarfundi fyrir hagsmunaaðila. Á kynningarfundum um ársuppgjör verður jafnframt farið yfir áætlanir félagsins og helstu verkefni.

Tveimur vikum fyrir lok hvers uppgjörstímabils og fram að uppgjöri veita Reitir engar upplýsingar um málefni er hafa áhrif á rekstur, afkomu og efnahag félagsins.

Það er markmið Reita að eiga góð samskipti við alla hagsmunaaðila. Í þeim tilgangi er meðal annars leitast við að veita þeim aðstoð við umfjöllun um félagið, innan þess ramma sem lög og reglur heimila.

Hluthafar, sem vilja beina fyrirspurnum til stjórnar, eða gera grein fyrir viðhorfum sínum tengdum rekstri, geta sent tölvupóst á stjorn@reitir.is. Fyrirspurnum, sem varða rekstur, verður svarað.

Reitir munu að meginreglu ekki tjá sig um sveiflur í verði hluta og viðskiptamagni. Sama á við um orðróm og getgátur á markaði.

Forstjóri Reita er talsmaður félagsins í umboði stjórnar. Hann getur veitt öðrum starfsmönnum félagsins tímabundna heimild til þess að tjá sig um afmarkaða þætti starfseminnar.

Forstjóri félagsins er Guðjón Auðunsson
netfang: gudjon@reitir.is
sími: 575-9000/660-3320

Þannig samþykkt í stjórn Reita fasteignafélags hf. 4. júní 2020.

Árangur af rekstri Reita fasteignafélags hf. (Reita) felst í fleiru en góðri fjárhagslegri afkomu. Velgengni félagsins til lengri tíma ræðst einnig af því hvernig til tekst að glæða grunngildi félagsins; jákvæðni, fagmennsku og samvinnu, lífi í daglegri starfsemi þess og hvernig stjórnendur og starfsfólk axla samfélagslega ábyrgð með siðferðilega ábyrgri, gegnsærri og jákvæðri háttsemi í störfum sínum.

Samfélagsleg ábyrgð Reita felur meðal annars í sér að félagið:

stuðlar að sjálfbærri þróun í umhverfis-, félags- og efnahagsmálum með heilbrigði og velferð samfélagsins að leiðarljósi

virðir gildandi lög og reglur og samræmir starfsemi sína alþjóðlega viðtekinni háttsemi

miðar að gagnkvæmni með því að skapa sameiginlegt virði fyrir alla hagsmunaaðila og samfélagið í heild

kemur auga á, fyrirbyggir og dregur úr hugsanlegum skaðlegum áhrifum af starfsemi sinni

Áhersla á samfélagslega ábyrgð er til þess fallin að auka traust á félaginu og treysta orðspor um leið og stuðlað er að betra og ábyrgara samfélagi.

Reitir leggja áherslu á vönduð vinnubrögð og ábyrgð í samfélagsmálum, og að vera eftirsóttur vinnustaður og öruggur fjárfestingarkostur.

Grunngildi félagsins, ásamt öðrum þeim reglum og stefnum sem félagið hefur sett sér, slá ramma um störf og framgöngu stjórnar Reita og starfsfólks. Taka ber mið af þeim við alla ákvarðanatöku og í samskiptum við samstarfsfólk, viðskiptavini, hluthafa og aðra hagsmunaaðila.

Reitir horfa til hinna 17 Heimsmarkmiða Sameinuðu þjóðanna um sjálfbæra þróun við setningu stefna sem félagið starfar eftir. Þannig leitast félagið við að leggja sitt af mörkum til að Heimsmarkmiðunum verði náð. Reitir leggja sérstaka áherslu á Heimsmarkmið nr. 8 Góð atvinna og hagvöxtur, nr. 11 Sjálfbærar borgir og samfélög og nr. 12 Ábyrg neysla og framleiðsla og gera grein fyrir hvernig gengur að fylgja markmiðunum eftir í samfélagsskýrslu sinni.

Stefna Reita varðandi samfélagslega ábyrgð nær til allrar starfsemi félagsins, svo sem reksturs skrifstofu félagsins, reksturs, viðhalds og framkvæmda í fasteignum félagsins og til þróunarverkefna þess. Starfsfólk og stjórn skal kynna sér stefnuna og virða hana í öllum störfum sínum fyrir félagið, auk þess að leita leiða til umbóta í umhverfis- og samfélagsmálum.

Stefna Reita varðandi samfélagslega ábyrgð skiptist í eftirfarandi þætti:

Umhverfisstefna Reita er sett fram til að leggja áherslu á umhverfismál í rekstri félagsins. Reitir skuldbinda sig til að draga úr umhverfisáhrifum félagsins í takt við markmið stefnunnar.

a. Endurvinnsla og úrgangur
Það er stefna Reita að til verði sem minnstur úrgangur í starfsemi félagsins, með skynsömum innkaupum og fræðslu til starfsfólks. Allur úrgangur frá skrifstofu félagsins er flokkaður með það að markmiði að stærstur hluti fari í endurvinnslu og sem minnst fari í almennt sorp.

Árlega er áætlað hve mikill úrgangur muni falla til við framkvæmdir á vegum félagsins og reynt að finna tækifæri til endurnýtingar.

Markmið: Haldið er utan um magn og meðhöndlun úrgangs í öllum stærri framkvæmdum. Flokkunarhlutfall fyrir hverja framkvæmd verði að minnsta kosti 90% fyrir árið 2025.

b. Orkunotkun og orkustýring
Í öllum framkvæmdum á vegum Reita er hugað að orkusparandi aðgerðum. Þetta á t.d. við um framkvæmdir við loftræsikerfi, ljósabúnað og hitakerfi. Mælar til sundurliðunar á rafmagns- og heitavatnsnotkun fasteigna verði settir upp samhliða stærri framkvæmdum.

Markmið: Rafmagnsnotkun og heitavatnsnotkun verði mæld og vöktuð í öllum fasteignum félagsins fyrir árið 2025.

c. Vatnsnotkun
Stefna Reita er að nýta vatn á sjálfbæran hátt. Þetta felur m.a. í sér að koma upp vatnssparandi tækjum við endurnýjun, fyrirbyggja að sóun verði vegna vatnsnotkunar í loftkælikerfum og fylgjast með vatnsnotkun í öllum stærri fasteignum. Stuðlað er að endurnýtingu og endurheimt vatns, m.a. með því að nota regnvatn til vökvunar á gróðri, þar sem tækifæri gefast við endurbætur og framkvæmdir.

Markmið: Vatnsnotkun verði mæld og vöktuð í öllum fasteignum félagsins fyrir árið 2025.

d. Samgöngur og ferðamátar
Reitir leggja sitt af mörkum við að draga úr notkun jarðefnaeldsneytis og til að styðja við vistvæna ferðamáta, m.a. með því að nota rafbíla í starfsemi sinni og að bæta aðstöðu fyrir starfsfólk sem velur að nota virka ferðamáta til og frá vinnu. Starfsfólki gefst kostur á að vinna heima að hluta, sem dregur úr samgönguþörf.

Áður en keyptur er flugmiði fyrir vinnuferðir, innanlands sem utan, er metið hvort hægt sé að leysa verkefnið með fjarfundi. Þetta er gert í því skyni að draga úr flugferðum þegar mögulegt er. Þær flugferðir sem farnar eru verði kolefnisjafnaðar.

Í þróunarverkefnum og stórum umbótaverkefnum er hugað að góðri aðstöðu fyrir vistvæna ferðamáta, svo sem tengingu við göngu- og hjólastíga og almenningssamgöngur og metin þörf fyrir hjólageymslur, deilifarartæki og rafhleðslustöðvar.

Markmið: Allir bílar í eigu og umsjón félagsins munu ganga fyrir sjálfbærum orkugjöfum.

e. Aðkeypt vara og þjónusta
Reitir nota umhverfisvottaðar rekstrarvörur á skrifstofu félagsins og hvetja leigutaka til að gera slíkt hið sama, t.d. með grænum leigusamningum. Valdar eru vörur í umbúðum sem hægt er að endurvinna og sem búa til sem minnstan úrgang.

Vistvæn byggingarefni verði fyrir valinu í verkefnum Reita þar sem kostur er. Lögð er áhersla á að nota efni sem hlotið hefur vottun, umhverfisyfirlýsingu eða er framleitt í heimabyggð og forðast efni sem geta losað eiturefni eða eru ósjálfbær í framleiðslu. Eins skal líta til kolefnisspors byggingaefna og velja byggingaefni með lægra kolefnisspor fram yfir annað.

Reitir horfa til hringrásarhagkerfis í kaupum á vörum og þjónustu, með vali á endurnýttum efnum þar sem tækifæri gefast, eða efnum sem hafa langan endingartíma og hægt er að endurnýta eða auðvelt er að endurvinna.

Markmið: Skriflegir verksamningar í framkvæmdaverkefnum á vegum Reita innihaldi ákvæði sem gera kröfu á verktaka um að velja umhverfisvottað byggingaefni umfram annað.

f. Þróunarverkefni og stærri framkvæmdaverkefni
Við þróun fasteigna og uppbyggingu nýrra svæða leggja Reitir áherslu á sjálfbærni við skipulag og hönnun. Lögð er áhersla á að taka þátt í að þétta byggð, styðja við nýjar samgönguleiðir með sjálfbærni og umhverfisáhrif í huga og að fasteignirnar séu hannaðar þannig að auki við lífsgæði þeirra sem nýta þær.

Í þróunarverkefnum er hugað að sjálfbærri nýtingu orku og vatns og horft til nýsköpunar og tæknilausna. Hugað er að aðstöðu sem styður við vistvænar samgöngur og flokkun og endurvinnslu, allt eftir gerð og þörfum hvers svæðis eða fasteignar. Í þróunarverkum og við stærri endurbætur lóða skal meta þörf fyrir blágrænar ofanvatnslausnir og stuðla að notkun vistfræðilega viðeigandi gróðurs á lóðum.

Við byggingarframkvæmdir á vegum Reita er kappkostað að áhrif af starfseminni valdi sem minnstri röskun á vistkerfinu, s.s. vegna flutnings búnaðar, umróts jarðefna og losunar efna.

Markmið: Að halda áfram að votta hluta þróunar- og endurbótaverka eða nýta viðmið vistvottunarkerfa í verkefnunum.

g. Aðlögun að áhrifum loftslagsbreytinga
Á sama tíma og Reitir leggja sig fram við að draga úr losun gróðurhúsalofttegunda til að vega á móti áhrifum loftslagsbreytinga þarf félagið einnig að aðlaga sig að þeim áhrifum sem eru fyrirséð. Tryggja þarf viðnámsþrótt eignasafnsins gagnvart loftslagsbreytingum.

Markmið: Áhrif loftslagsbreytinga á allar fasteignir félagsins verði metnar, unnið áhættumat og gerðar tillögur að aðgerðum til að auka viðnámsþrótt fasteignanna þar sem þörf er á.

Reitir meta kolefnislosun frá starfsemi sinni og birta opinberlega á hverju ári. Að draga úr losun gróðurhúsalofttegunda er eitt mikilvægasta framlag félagsins til að vinna gegn áhrifum loftslagsbreytinga.

Markmið: Reitir stefna á að draga úr kolefnislosun um að jafnaði 5% á ári og kolefnisjafna umfang 1 og 2, auk flugferða frá og með árinu 2020. Reitir stefna að kolefnishlutleysi fyrir árið 2040.

Reitir líta svo á að hver einstaklingur sé jafnborinn til virðingar og réttinda. Félagið skuldbindur sig til að virða almenn mannréttindi í allri starfsemi sinni.

Reitir virða félagafrelsi og viðurkenna rétt manna til kjarasamninga.

Reitir kappkosta að skapa starfsfólki sínu jöfn tækifæri og heilbrigt, öruggt og hvetjandi vinnuumhverfi. Allt starfsfólk Reita skal hafa jöfn tækifæri til þróunar í starfi, óháð kynferði, kynþætti, trúar, stjórnmálaskoðana, aldurs, kynhneigðar, atgervis, fötlunar eða efnahags. Reitir líða ekki mismunun á grundvelli framangreindra þátta og vill í störfum sínum stuðla að því að fólk fái notið hæfileika, sér og samfélaginu til ávinnings.

Við ráðningu nýs starfsfólks, starfsþróun, skipun í nefndir og stjórnendastörf skal unnið að jafnri kynjaskiptingu og fjölbreytileika eftir fremsta megni.

Allt starfsfólk Reita, óháð framangreindum þáttum, fær jöfn laun fyrir sömu eða jafnverðmæt og sambærileg störf. Launamunur skal eingöngu speglast í mismunandi ábyrgð, eðli starfa, menntun, starfsreynslu og hæfni.

Reitir líða ekki ógnandi tilburði, einelti eða ofbeldi af nokkru tagi svo sem svívirðingar, baktal eða áreitni af neinum toga. Hverjum einstaklingi sem telur sig hafa orðið fyrir áreitni er rétt að tilkynna atvikið til yfirmanns eða trúnaðarmanns.

Reitir hafa sett stefnu gegn einelti, áreitni og ofbeldi og sett sér verklag um viðbrögð við einelti, áreitni og ofbeldi sem kynnt er öllu starfsfólki og aðgengilegt því á innri vef félagsins.

Það samræmist ekki stefnu Reita að eiga í viðskiptum við aðila sem virða ekki almenn mannréttindi, svo sem réttindi á vinnumarkaði, rétt til félagafrelsis og rétt til góðs aðbúnaðar starfsfólks síns og öryggis þeirra. Ákvæði þar að lútandi er að finna í verksamningum og leigusamningum félagsins og geta brot gegn þeim leitt til uppsagnar og/eða tafarlausrar riftunar samninga af hálfu Reita.

Það samræmist ekki stefnu Reita að eiga í viðskiptum við aðila sem tengjast barnaþrælkun eða nauðungar- og þrælkunarvinnu af neinu tagi og skal félagið forðast að eiga í viðskiptum við slíka aðila.

Það samræmist ekki stefnu Reita að eiga í viðskiptum við aðila sem fara ekki að lögum og reglum í starfsemi sinni að öðru leyti, svo sem varðandi kjaramál, skattgreiðslur, heilbrigðis- og hollustuhætti og umhverfismál.

III. Siðareglur Reita og varnir gegn spillingar- og mútumálum

Reitir fara í öllu að þeim lögum og reglum sem um starfsemina gilda, og skuldbinda sig til að fylgja almennum viðmiðum um viðskiptasiðferði ásamt eigin reglum sem og að fylgja góðum stjórnarháttum.

Reitir vinna gegn hvers kyns spillingu þar sem því er viðkomið í tengslum við starfsemi félagsins, þar með talið kúgun, mútum og ólöglegri atvinnustarfsemi.

Starfsfólk Reita veitir ekki undir neinum kringumstæðum ósannar eða villandi upplýsingar. Þess er gætt að varpa ekki rýrð á stöðu keppinauta félagsins heldur tryggja að allur samanburður sé sanngjarn og nákvæmur.

Starfsfólk Reita skal forðast að lenda í þeim aðstæðum að persónulegir eða fjárhagslegir hagsmunir þeirra geti stangast á við hagsmuni félagsins.

Hvað eina sem stjórn og starfsfólk verður áskynja um í störfum sínum fyrir Reiti um rekstur félagsins eða viðskiptavina þess og talist getur trúnaðarupplýsingar, skal meðhöndlað sem slíkt nema lög standi til annars. Starfsfólki er með öllu óheimilt að nota trúnaðarupplýsingar úr starfi í eigin ábataskyni.

Eingöngu starfsfólk hefur aðgang að skrifstofu félagsins. Starfsfólk skal læsa skjám og deila aldrei aðgangskóðum með öðrum, til að tryggja öryggi gagna og upplýsinga.

Þess er vandlega gætt að persónulegar, starfstengdar upplýsingar um starfsfólk félagsins séu ekki veittar þriðja aðila þvert á reglur félagsins.

Reitir hafa sett sér Persónuverndarstefnu sem birt er á vefsíðu félagsins og skal starfsfólk fara í einu og öllu eftir Persónuverndarlögum og reglum GDPR (General Data Protection Regulation), þ.m.t. halda utan um vinnsluskrá. Settir hafa verið verkferlar í samræmi við Persónuverndarlög.

Siðferðileg vafamál – vernd uppljóstrara

Starfsfólk Reita er hvatt til þess að ræða við forstjóra, eða stjórnarformann ef mál varðar forstjóra, ef það telur siðferðileg vafamál koma upp tengd starfsemi félagsins. Jafnframt er lagt að starfsfólki að tilkynna forstjóra eða stjórnarformanni um misbresti sem það verður vart við.

Starfsfólk skal í engu gjalda þess að beina slíkum tilkynningum í góðri trú til forstjóra eða stjórnarformanns, enda gilda um slíkar tilkynningar lög um vernd uppljóstrara og skal fara með tilkynningar í samræmi við ákvæði þeirra laga, þ.m.t. um vernd uppljóstrara og viðbrögð móttakanda tilkynningar.

Starfsfólki Reita eru kynnt ákvæði laga um vernd uppljóstrara og verklagsreglur þær sem félagið hefur sett um uppljóstrun starfsmanna um lögbrot eða aðra ámælisverða háttsemi.

B. Siðareglur birgja (e. Suppliers Code of Conduct)

Reitir hafa sett sérstakar Siðareglur birgja (e. Suppliers Code of Conduct) innan félagsins og byggja þær á sama grunni og stefna þessi um samfélagslega ábyrgð. Er siðareglunum ætlað að auðvelda félaginu að framfylgja stefnu þessari um samfélagslega ábyrgð auk þess að veita birgjum hvatningu til að bæta viðskiptahætti þegar það á við.

Siðareglurnar ná til allra stærri eða viðvarandi birgja félagsins og er þeim gert að tryggja framfylgd undirverktaka eða birgja sinna þegar kemur að verkefnum sem unnin eru fyrir Reiti.

Siðareglurnar eru afhentar þeim birgjum Reita sem þær eiga við um við upphaf viðskiptasambands og þeim gert að undirrita staðfestingu á að þeir hafi móttekið þær og muni virða þau ákvæði sem þar eru sett fram.

IV. Stefna varðandi heilsu og öryggi starfsfólks

Reitum er umhugað um öryggi, heilsu og vellíðan starfsfólks og sér félagið til þess að starfsfólk fái góða vinnuaðstöðu og heilnæmt vinnuumhverfi. Þurfi starfsfólk að fara á vinnusvæði, er því útvegað öryggis- og hlífðarföt, til að draga úr líkum á slysum. Að sama skapi huga Reitir að því að umhverfi fasteigna sinna sé heilnæmt og öruggt fyrir leigutaka sína og viðskiptavini þeirra að því marki sem Reitir hafa forræði á slíku.

Reitir leggja áherslu á jafnvægi vinnu og einkalífs þannig að afköst séu hámörkuð, en um leið sé hlúð að starfsánægju starfsfólksins. Félagið vill stuðla að sveigjanleika í vinnu og tryggir að starfsfólk hafi þá tækni og tæki sem þarf til að geta unnið heiman frá sér þegar það hentar, og þegar verkefni og eðli þeirra leyfa. Horft er til þarfa og óska starfsfólks í þeim efnum.

Starfsfólk er hvatt til þess að hlúa að heilsu sinni og hreyfingu, tryggt er að aðstæður bjóði upp á að starfsfólk komi gangandi eða hjólandi til vinnu, m.a. með því að tryggja aðgang að sturtu, búningsaðstöðu, hjólastöndum o.s.frv. Reitir hafa rafbíla til taks fyrir starfsfólk til afnota á vinnutíma vegna vinnutengdra ferða.

Reitir hvetja til endurmenntunar starfsfólks. Er starfsfólk hvatt til að skrá sig á námskeið sem snúa að og geta nýst í þeirra starfi, en auk þess eru reglulega haldnir fræðslufundir innanhúss þar sem fólk úr ýmsum atvinnugreinum miðlar af þekkingu sinni til starfsfólks um ýmis mál.

Reitir leggja áherslu á að starfsfólk njóti sömu réttinda og tækifæra í störfum sínum fyrir félagið óháð kynferði, kynþætti, trúar, stjórnmálaskoðana, aldurs, kynhneigðar, atgervis, fötlunar eða efnahags . Markmið félagsins er að jafna hlutfall kynjanna í stjórnunarstöðum, og skal horfa til þess í ráðningum í nýjar og núverandi stjórnunarstöður, samhliða þess að gæta þess að hver einstaklingur sé metin að verðleikum. Að sama skapi skal leitast við að jafna kynjahlutfall í hópi starfsfólks, enda er það trú félagsins að með fjölbreyttum hópi starfsfólks og stjórnenda, með ólíkan bakgrunn sem endurspeglar samfélagið, nái félagið bestum árangri.

Samþykktir félagsins kveða á um að tryggja skuli kynjahlutfall þegar valið er í stjórn félagsins eins og gert er ráð fyrir í lögum.

Félagið greiðir samkeppnishæf laun og starfsfólk nýtur sömu kjara fyrir sömu eða jafnverðmæt störf, óháð kyni.

Sem ábyrgur samfélagsþegn leggja Reitir samfélagsverkefnum lið. Aðstoðin snýr að félagasamtökum og félögum sem starfa í takti við stefnu félagsins varðandi samfélagslega ábyrgð.

Félagið leggur áherslu á samstarf og samvinnu í umhverfismálum og félagslegum þáttum og leitast við að deila reynslu sinni af umbótum með það að markmiði að efla þekkingu, áhuga og getu allra markaðsaðila. Sem dæmi má nefna samvinnu um verkefni til að draga úr kolefnisspori bygginga.

Samþykktir, stefnur og starfsreglur

Fyrirmyndarfyrirtæki í góðum stjórnarháttum síðan 2015

Tengt efni