Niðurstaða í samkeppni um Orkuhússreit

ALARK arkitektar urðu hlutskarpastir í hugmyndasamkeppni um framtíðaruppbyggingu á Orkuhússreit. Reitir og Reykjavíkurborg stóðu fyrir keppninni í samstarfi við Arkitektafélag Íslands. Vinningstillagan gerir ráð fyrir 450 íbúðum auk atvinnuhúsnæðis að hluta.
Niðurstaða í samkeppni um Orkuhússreit

Þrjár arkitektastofur, Alark arkitektar, Trípólí og Yrki arkitektar, voru fengnar til að vinna hugmyndir á grundvelli forsagnar fyrir svæðið. Tillögurnar voru ólíkar og höfðu allar að geyma áhugaverðar hugmyndir sem vert er að skoða nánar í framhaldsvinnu við breytingar á deiliskipulagi.

Vinningstillaga ALARK gerir ráð fyrir fjórum byggingaráföngum þar sem gert er ráð fyrir 450 íbúðum auk atvinnuhúsnæðis að hluta. Tillagan gerir ráð fyrir 4-9 hæða byggingum sem mynda randbyggð með sólríkum og skjólgóðum inngörðum sem eru að hluta til opnir og tengdir saman með göngu- og hjólastígum þar sem Orkuhúsið fær ákveðinn virðingarsess.  

Í umsögn dómnefndar segir að tillagan uppfylli meginmarkmið samkeppninnar vel og skipulagshugmyndin sé bæði skýr og vel fram sett. Jafnframt segir að tillagan bjóði upp á gott heildaryfirbragð fyrir íbúðir og atvinnustarfsemi í aðlaðandi og eftirsóknarverðu umhverfi.

Nú þegar dómnefnd hefur lagt mat á framlagðar hugmyndir er gert ráð fyrir að eiginleg skipulagsvinna geti hafist og uppbyggingin útfærð nánar og tímasett. Gert er ráð fyrir að framkvæmdir á lóðinni geti hafist innan tveggja ára frá því að breyting á deiliskipulagi hefur verið samþykkt. 

Kristján Ásgeirsson, Alark arkitektum, Hans Orri Kristjánsson, Alark arkitektum, Friðjón Sigurðarson, framkvæmdastjóri þróunarsviðs Reita, og Jakob E. Líndal, Alark arkitektum.
Frá vinstri; Kristján Ásgeirsson, Alark arkitektum, Hans Orri Kristjánsson, Alark arkitektum, Friðjón Sigurðarson, framkvæmdastjóri þróunarsviðs Reita, og Jakob E. Líndal, Alark arkitektum.

 

Tengt efni:
>> Orkuhússreitur - Niðurstaða hugmyndasamkeppni og umsagnir dómnefndar