Uppbygging fyrirhuguð á Orkuhússreitnum

Gert er ráð fyrir að lóðin Suðurlandsbraut 34 / Ármúli 31 geti rúmað 4 – 500 íbúðir ásamt húsnæði fyrir atvinnustarfsemi. Iðnaðarhúsnæði sem fyrir er við Ármúla mun víkja fyrir þessari uppbyggingu. Gert er ráð fyrir að Orkuhúsið muni standa áfram.
Uppbygging fyrirhuguð á Orkuhússreitnum

Borgarstjóri og Guðjón Auðunsson, forstjóri Reita, skrifuðu í dag undir viljayfirlýsingu um samstarfið og uppbygginguna. Undirskriftin fór fram á þakhæð Orkuhússins.  

„Þetta er stór og mikilvægur uppbyggingarreitur í borginni sem stendur meðfram fyrsta áfanga Borgarlínu. Það er mikilvægt að samstaða er um að stefna að fjölbreyttri, spennandi og blandaðri byggð. Suðurlandsbrautin er hryggjarstykkið í nýjum þróunarási borgarinnar sem nær frá Hlemmi upp að Ártúnshöfða þannig að þetta eru mikilvæg tímamót og verkefni sem vonandi mun gefa tóninn á svæðinu,“ segir Dagur B. Eggertsson borgarstjóri.

„Reitir hafa í nokkurn tíma haft áform um að nýta betur stóra lóð félagsins sem stendur á mikilvægum reit á horni Suðurlandsbrautar og Grensásvegar,“ segir Guðjón Auðunsson forstjóri Reita. „Að mati félagsins er staðsetning lóðarinnar afar vel til þess fallin til að þróa þar blandaða byggð sem felur í sér aukna áherslu á íbúðir í bland við atvinnuhúsnæði. Þá mun fyrirhuguð uppbygging njóta góðs af nálægð við þjónustu í Skeifunni og Glæsibæ sem og við útisvistarsvæði í Laugardal, íþróttir og ekki síst samgöngur, þar sem borgarlínunni er ætlað að liggja um Suðurlandsbraut.“

Guðjón Auðunsson, forstjóri Reita, og Dagur B. Eggertsson, borgarstjóri, undirrita viljayfirlýsingu um uppbyggingu á Orkuhúsreitnum
Guðjón Auðunsson, forstjóri Reita, og Dagur B. Eggertsson, borgarstjóri, undirrita viljayfirlýsingu um uppbyggingu á Orkuhússreitnum. 

Í viljayfirlýsingu kemur fram að deiliskipulag fyrir svæðið verði endurskoðað í samræmi við aðalskipulag Reykjavíkur 2010 – 2030 og verða þrjár arkitektastofur fengnar til að vinna hugmyndir að breyttu skipulagi.  Gert er ráð fyrir að lóðin verði minnkuð við Suðurlandsbraut vegna fyrirhugaðra legu Borgarlínu.


Orkuhúsreiturinn. Mynd: Sahara.
Orkuhússreiturinn séður úr lofti. 
Lága byggingin í forgrunni er meðal þess sem gert er ráð fyrir að víki fyrir nýbyggingum.
Lága byggingin í forgrunni er meðal þess sem gert er ráð fyrir að víki fyrir nýbyggingum.  

Áform sem voru  kynnt í borgarráði í desember miða við blandaða byggð og að heildarbyggingarmagn á lóðinni verði að lágmarki 45.000 fermetrar, íbúðir verði 400 til 500 talsins  og atvinnuhúsnæði um 5 - 6.000 fermetrar. Endanlegt byggingamagn, útfærsla og gerð húsnæðis mun taka mið af fyrirhugaðri hugmyndasamkeppni um skipulag lóðarinnar. Uppbygging á lóðinni verður í samræmi við markmið og í anda húsnæðisáætlunar Reykjavíkurborgar þannig að um 15% íbúða á lóðinni verða leiguíbúðir, íbúðir Félagsbústaða, stúdentaíbúðir, búseturéttaríbúðir og/eða íbúðir fyrir aldraða.

Þegar deiliskipulagshugmynd liggur fyrir verður uppbyggingin útfærð nánar og tímasett, sem og gengið frá samkomulagi um  greiðslur, kauprétt og kvaðir. Gert er ráð fyrir að framkvæmdir við uppbyggingu á lóðinni geti hafist innan tveggja ára frá því nýtt deiliskipulag hefur verið samþykkt.

Nánari upplýsingar veitir Guðjón Auðunsson, forstjóri Reita í gudjon@reitir.is eða 660 3320.

 

Viljayfirlýsing Reita og Reykjavíkurborgar um samstarf á Orkuhúsreitnum