Holtagarðar verða samgöngumiðstöð

Ný samgöngumiðstöð að Holtagörðum verður helsti brottfararstaður hjá Gray Line rútuferðum, áætlað er að daglegum gestum í Holtagarða fjölgi um rúmlega 1000. AVIS og Budget bílaleigur verða með stóra afgreiðslustöð í Holtagörðum.
Holtagarðar verða samgöngumiðstöð
  • Ný samgöngumiðstöð í Holtagörðum verður helsti brottfararstaður hjá Gray Line rútuferðum
  • Áætlað að daglegum gestum í Holtagarða fjölgi um rúmlega 1000
  • AVIS og Budget bílaleigur verða með stóra afgreiðslustöð í Holtagörðum

Reitir fasteignafélag, eigandi Holtagarða, hefur undirritað leigusamninga við Gray Line Iceland og við ALP hf., sem rekur Avis og Budget bílaleigur, um húsnæði í Holtagörðum. Gray Line þjónustar aðallega erlenda ferðamenn í dagsferðum með leiðsögumanni auk þess að bjóða upp á áætlunarferðir á milli Keflavíkurflugvallar og Reykjavíkur í tengslum við öll áætlunarflug sem fara um alþjóðaflugvöllinn. Nær daglega fara hópferðabílar félagsins frá Reykjavík í ferðir á vinsælustu ferðamannasvæði frá Jökulsárlóni í austri að Látrabjargi í vestri. Áformað er að flestallar ferðir Gray Line hefjist og endi í Holtagörðum, minni bílar flytja ferðamenn til og frá gististöðum.

Í Holtagörðum munu ALP sameina aðalskrifstofu sína ásamt stórri leigustöð fyrir Avis og Budget. Þar verður einnig fullkomin þvottastöð og verkstæði.

Nýtt þjónustu- og veitingatorg

Samgöngumiðstöðin verður í suðvestur hluta hússins og verða töluverðar breytingar gerðar á húsnæðinu, bílastæðinu og umferðarflæði í tengslum við þessa nýju starfsemi. Verið er að vinna að hönnun á veitingatorgi og skipulagi á svæði fyrir verslanir með varning fyrir ferðamenn. Unnið er að endurhönnun aðkomunnar að húsinu í samráði við borgaryfirvöld. Engin fyrirtæki flytja úr Holtagörðum í tengslum við þessa breytingu.

Drög að skipulagi samgöngumiðstöðvar í Holtagörðum

Gray Line Iceland

Gray Line Iceland er á meðal leiðandi fyrirtækja í ferðaþjónustu á Íslandi. Félagið býður fjölbreytt úrval skoðunarferða, dagsferða, pakkaferða og ýmsa sérhannaða ferðaþjónustu. Félagið á og rekur um 70 hópferðabíla.

Avis og Budget bílaleigur

ALP hf er umboðsaðili Avis og Budget og er ein af stærstu bílaleigum á Íslandi, með yfir 2000 bifreiðar til útleigu. Fyrirtækið er það stærsta í útleigu bifreiða til erlendra ferðamanna ásamt því að vera leiðandi í langtímaleigu á bifreiðum til einstaklinga og fyrirtækja.

Reitir fasteignafélag

 

Reitir sérhæfa sig í þjónustu og rekstri atvinnuhúsnæðis með áherslu á verslunarhúsnæði, skrifstofu­húsnæði og hótelbyggingar á höfuðborgarsvæðinu. Heildareignir Reita í árslok 2014 námu 102 milljörðum króna. Fasteignir í eigu félagsins eru um 130 talsins og um 420 þúsund fermetrar að stærð. Innan fasteignasafns Reita má finna verslunarhúsnæði í helstu verslunarmiðstöðvum landsins, fjölbreytt skrifstofuhúsnæði og margskonar lager- og iðnaðarhúsnæði. Meðal fasteigna má nefna stærstan hluta Kringlunnar, Spöngina, Hilton Reykjavík Nordica, Icelandair hótel Reykjavík Natura, Kauphallarhúsið og nokkrar af perlum íslenskrar byggingarsögu í miðbæ Reykjavíkur.