Bókasafn í Spöngina

Bókasafn í Spöngina
Reitir og Reykjavíkurborg hafa gert með sér leigusamning um húsnæði fyrir bókasafn í Spönginni, samningurinn hefur nú fengið samþykki borgarráðs. Húsnæðið, sem er um 1300 fermetrar, kemur til með að hýsa Foldasafn Borgarbókasafns.

Reitir og Reykjavíkurborg hafa gert með sér leigusamning um húsnæði fyrir bókasafn í Spönginni, samningurinn hefur nú fengið samþykki borgarráðs. Húsnæðið, sem er um 1300 fermetrar, kemur til með að hýsa Foldasafn Borgarbókasafns. 

Reitir hafa þegar hafist handa við breytingar á húsnæðinu, sem áður hýsti líkamsræktarstöð, þannig að það henti fyrir hina nýju starfsemi.

Að því er segir á heimasíðu Reykjavíkurborgar þá hefur Foldasafn Borgarbókasafns undanfarin 18 ár verið staðsett í 702 m2 húsnæði í kjallara Grafarvogskirkju. Við flutning í nýtt og stærra hús mun skapast tækifæri til að breyta áherslum í rekstri bókasafnsins.

Dagur B. Eggertsson borgarstjóri segir safnið hugsað sem miðstöð menningar og mannlífs í Grafarvogi. „Það er mikilvægt að í einu fjölmennasta hverfi borgarinnar sé til gott bókasafn. Bæði fyrir íbúana í hverfinu og aðra borgarbúar sem vilja geta notið fjölbreyttrar afþreyingar, þjónustu og menningarstarfsemi“ segir Dagur.

Í safninu verða góð borð og stólar til afnota fyrir lestraraðstöðu sem kemur nemum að góðum notum en í næsta nágrenni við safnið er stór framhaldsskóli. Safnið er einnig á mörkum fjögurra grunnskólahverfa í Grafarvogi en í núverandi húsnæði er engin slík aðstaða fyrir hendi. 

Þá er einnig gert ráð fyrir fjölnota sal og tveimur minni fundarsölum sem nýtast mun undir ráðstefnur, fundi og aðra viðburði.

Ahending húsnæðisins verður 1. september næstkomandi.